មួយរយៈចុងក្រោយនេះគេសង្កេតឃើញតារាជាច្រើនបានសម្រាលកូនជាបន្តបន្ទាប់តែពួកគេមិនបានរៀបការតាមប្រពៃណីខ្មែរនោះទេ។ តារាខ្លះបានអះអាងថាបានចុះសំបុត្រអាពាហ៍ត្រឹមត្រូវតាមផ្លូវច្បាប់ ។ តែខ្លះទៀតនៅតែលាក់លៀមនិងមិនបង្ហាញមុខមាត់ស្វាមីថាជានរណានោះទេ ។
តារាសម្តែងរូបស្រស់ ភិន សុដាលីស ក៏បានទទួលចំណងដៃកូនស្រីមួយរូបដ៏ស្រស់ស្អាតក្រោយពីនាងបានសាងស្នេហ៍ជាមួយតារាសម្តែងរូបសង្ហា ប៉ែន ចំរ៉ុង ។ តែយ៉ាងណាចំណងស្នេហ៍របស់អ្នកទាំងពីរបានរង្គោះរង្គើរក្រោយពី ភិន សុដាលីស មានផ្ទៃពោះ ។ កាលណោះ ភិន សុដាលីស និង បែ៉ន ចំរ៉ុង មិនបានរៀបការតាមប្រពៃណីខ្មែរទេ តែពួកគេបានចុះសំបុត្រអាពាហ៍ពិពាហ៍រួចហើយ ។ ក្រោយបែកគ្នា រឿងរបស់ ភិន សុដាលីស ក៏បានឡើងដល់តុលាការផងដែរ ។
ក្រោយបាត់មុខមួយរយៈអតីតពិធីការិនី ឈិត សុជាតា បានលេចលឺដំណឹងមានកូនភ្លោះកាលពីដើមឆ្នាំ ២០១៧ ។ តែយ៉ាងណា ឈិត សុជាតា បានទទួលស្គាល់ថានាងពិតជាមានកូនភ្លោះពិតមែនដែលនាងបានទៅធ្វើការវះកាត់នៅប្រទេសថៃ ។ ប៉ុន្តែយ៉ាងណារហូតមកដល់ ពេលនេះ ឈិត សុជាតា មិនបានបង្ហាញមុខមាត់ស្វាមីនោះទេ ។ កូនភ្លោះ ឈិត សុជាតា មានមុខមាត់ស្រស់ស្អាតដូចកូនកាត់បរទេស ។ ក្រោយប្រកាសមានកូនអតីតតារាដែលមានប្រភពមកពីខេត្តតាកែវរូបនេះក៏បានលាឈប់ពីការងារសិល្បៈដែរ ។
ស្ងាត់តារាកំប្លែងរូបស្រស់ ស្រីលាភ បានធ្វើឱ្យមហាជនមានការភ្ញាក់ផ្អើលនៅពេលដែលមានលេចលឺពត៌មានថាតារាកំប្លែងរូបនេះកំពុងពរពោះកូនភ្លោះស្រីពីរនាក់ប្រមាណជាជិត ៧ ខែ ។ ក្នុងនោះក៏មានការឆ្ងល់ថានរណាជាឱពុករបស់ក្មេងក្នុងផ្ទៃ ស្រីលាភ ។ តែ ស្រីលាភ ហាក់មិនខ្វាយខ្វល់ក្នុងការបកស្រាយនោះទេ ។ ចាប់តាំងពីចូលកំប្លែងមក ស្រីលាភ តែងតែលេចលឺពត៌មានថាមានទំនាក់ទំនងស្នេហាជា មួយ នាយក្រឹម ហើយក៏មិនដែលដឹងថាតារាកំប្លែងរូបនេះរៀបការនោះទេ ។ ដោយសារពោះខ្ទាតធំ ស្រីលាភ បានច្រានចោលការងារសិល្បៈទាំងអស់ ។
ក្រោយបាត់មុខមួយរយៈអតីតពិធីការិនី មួយ មួយ បានសម្ងំសម្រាលបានកូនស្រីដ៏ស្រស់ស្អាតម្នាក់ដែលពេលនេះមានវ័យប្រមាណជិត មួយ ខួប ។ ប៉ុន្តែអ្វីដែលគួរឱ្យកត់សម្គាល់ទោះបីមានកូនក៏ពិតមែន តែរហូតមកដល់ពេលនេះគេមិនទាន់ឃើញស្រីស្អាត មួយ មួយ បង្ហាញ មុខ គូស្នេហ៍អោយគេបានស្គាល់ឡើយ ។ ក្នុងនោះក៏មានការបង្ហើបថា មួយ មួយ និង គូស្នេហ៍បានបែកគ្នាហើយដោយបន្សល់ទុកចំណងដៃ កូនស្រីមួយនេះ ។ សព្វថ្ងៃ មួយ មួយ បានដកខ្លួនពីសិល្បៈហើយតែនៅពេលមានកម្មវិធីកម្សាន្តរបស់មិត្តរួមអាជីព មួយ មួយ តែងបង្ហាញ មុខរហូត ។
ក្រោយបែកជាមួយអតីតស្វាមីលោក កា សាវុធ មិនទាន់បានប៉ុន្មានផងតារាចម្រៀងពូកែគ្រលែងចង្កេះ ម៉ៅ ស៊ីុណាត បានជួបគូស្នេហ៍ថ្មី ដែលពេលនេះ ម៉ៅ ស៊ីណាត បានសម្រាលបានកូនស្រីម្នាក់ដែលមានអាយុជិតមួយខួប ។ ថ្វីត្បិតទទួលបានកូនស្រីមួយ ដែលជាចំណង ដៃ ក៏ពិតមែន តែអ្នកនាង ម៉ៅ ស៊ីុណាត មិនខ្វល់ពីរឿងរៀបការនោះទេ ។ តែសំខាន់មានការ បង្ហើបថាអ្នកនាង ម៉ៅ ស៊ីុណាត និង គូស្នេហ៍បានចុះអេតាស៊ីុវិលរួចរាល់ហើយ ។ ម៉ៅ ស៊ីណាត ក៏មិនខ្វល់ពីការរិះគន់ពីសំណាក់មហាជននោះទេ ។
តារាសម្តែង ឆយី ក៏មិនខុសពីតារាខាងលើដែរ ស្ងាត់ៗ ឆយី បានពពោះ និង សម្រាលបានកូនស្រីម្នាក់ដែលមានវ័យជិតពីរខួប ។ ចាប់តាំងពីមានផ្ទៃពោះរហូតដល់កូនធំប៉ុននេះ ឆយី មិនដែលបង្ហាញ និង ប្រាប់ថាគូស្នេហ៍របស់នាងជានរណាឡើយ ។ ប៉ុន្តែ ឆយី និង គូស្នេហ៍បានបែកបាក់តាំងពីនាងទើបពពោះម៉្លេះ ។ ឆយី មិនដែលខ្វល់នឹងការរិះគន់ពីសំណាក់មហាជនដែលថានាងមានកូនមិនរៀបការនោះទេ ៕ Credit : The Popular Magazine
