បើគិតមកដល់ពេលនេះ អតីតតារាសម្តែងរូបស្រស់សិចស៊ី វ៉ាង ស្រីណូ បានចាកចេញពីអាជីពសិល្បៈអស់រយៈពេលជាច្រើនឆ្នាំមកហើយ ។ មហាជនជាច្រើននៅតែចាប់អារម្មណ៍ និង គាំទ្រចង់ឱ្យនាងវិលចូលមកក្នុងអាជីពនេះម្តងទៀត។ អ្វីដែលកត់សម្គាល់នោះ ទោះបីជាមិនប្រឡូកក្នុងសិល្បៈ តែអតីតតារាសម្តែងសិចស៊ីរូបនេះបានលេចមុខក្នុងការងារមនុស្សធម៌ ដោយថ្មីៗនេះនាងបានរៀបចំជាចំណីអាហារជូនដល់ជនក្រីក្រនៅតាមដងផ្លូវទៀតផង ។
ទោះបីជាមិនមែនជាអំណោយធំដុំក្តី តែមហាជនជាច្រើនបានសរសើរពីទឹកចិត្តសប្បុរធម៌របស់ វ៉ាង ស្រីណូ ដោយនាង បានរៀបចំចំណីអាហារ រួមជាមួយភេសជ្ជៈ និង ទឹកប្រាក់ជូនដល់ជនក្រីក្រ ដែលមានដូចជាអ្នកធាក់ស៊ីក្លូ និងក្មេងៗគ្មានទីពឹងជាដើម ។ បើតាមរូបថតរបស់ វ៉ាង ស្រីណូ គេបានសន្និដ្ឋានថា អាហារទាំងនោះគឺនាងរៀបចំដោយផ្ទាល់ដៃ ។ មហាជនទូទៅបានសរសើរពីទង្វើររបស់ វ៉ាង ស្រីណូ ដែលផ្តល់នូវទឹកចិត្តស្រឡាញ់ និង អាណិតដល់ជនក្រីក្របែបនេះ ។
អស់រយៈពេលជាច្រើនឆ្នាំ ដែលចាកចេញពីការងារសិល្បៈ តែ វ៉ាង ស្រីណូ នៅតែមានសម្រស់ស្រស់ស្អាតមិនប្រែប្រួលឡើយ ។ ពេលនេះដែរ នាងបានងាកមកលក់ផលិតផលជាច្រើននៅតាមអនឡាញ ។ ពេលខ្លះ វ៉ាង ស្រីណូ ក៏បានចេញទៅលម្ហែកាយនៅក្រៅប្រទេសមានដូចជា សហរដ្ឋអាមេរិក ជាដើម ។
មហាជនជាច្រើននៅតែចង់ឱ្យ វ៉ាង ស្រីណូ ចូលប្រឡូកសិល្បៈម្តងទៀត ។ ប៉ុន្តែមិនអាចទេ ដោយសារសព្វថ្ងៃ វ៉ាង ស្រីណូ រស់នៅក្នុងជីវភាពហ៊ឺហា និង កាលីបមិនចង់សន្សំលុយកាក់ល្អិតដូចមុនឡើយ ។ រហូតមកដល់ពេលនេះ គេមិនទាន់ដឹងថា អតីតតារារូបស្រស់ម្នាក់នេះ មានគូស្នេហ៍ហើយ ឬ យ៉ាងណានោះទេ។
វ៉ាង ស្រីណូ គឺជាតារាសម្តែងរូបស្រស់ និង សិចស៊ីកាលពីប៉ុន្មានឆ្នាំមុន ។ នាងធ្លាប់ជាប់ឈ្មោះជាតារាសិចស៊ីប្រចាំឆ្នាំជាប់ៗគ្នានៅក្នុងទស្សាវដ្តីប្រជាប្រិយទៀតផង ។ នាងបានចូលរួមនៅក្នុងការសម្តែងរឿង ថតស្ប៉តពាណិជ្ជកម្ម និង ចម្រៀងខារ៉ាអូខេជាច្រើនទៀតផង។ ប៉ុន្តែក្រោយមក នាងក៏បានចាកចេញពីអាជីពនេះទៅវិញ ៕
