អ្នកនាង ចោមច័ន្ទ ដែលគេស្គាល់ថាជាបងស្រីរបស់ ដេននី ក្វាន់ បានអះអាងពីផែនការជីវិតរបស់ កូនស្រីខ្លួន ប្រាប់ នៅរសៀលថ្ងៃទី២ ខែតុលា ឆ្នាំ២០១៧ ថា អ្នកនាងបានរៀបចំគម្រោងជីវិតរបស់នាងល្អហួស រួចរាល់ហើយ ទៅតាមអ្វីដែល កូនស្រី អ្នកនាងចង់បាន ។
អ្នកនាង ចោមច័ន្ទ ថា សម្រាប់នាង «ល្អហួស» ដែលគេហៅថា យ៉ាយ៉ាទី២ នោះ នឹងត្រូវផ្លាស់ពីព្រះវិហារ មករៀននៅរាជធានីភ្នំពេញ ក្នុងពេលឆាប់ៗខាងមុខនេះ ដោយនឹងចូលរៀននៅសាលាវិចិត្រសិល្បៈ ដើម្បីបំពេញបំណងប្រាថ្នារបស់នាង។ ម្យ៉ាងវិញទៀត អ្នកនាងមិនចង់ចុះខេត្តញឹកញាប់ពេកទេ ពេលដែលនឹកកូន គឺមានកូននៅជិត មិនដូចមុនៗ ពេលនឹកត្រូវតែទៅខេត្តនោះ។
អ្នកម្តាយដ៏សិចស៊ី ដែលត្រូវជាបងស្រីតារាសិចស៊ីដេននី ក្វាន់ បានបន្តទៀតថា កូនអ្នកស្រីអ្នកនាងពិតជាមានដុងសិល្បៈ ដោយបំណងរបស់នាង ចង់ច្រៀង សម្តែង និង ពិធីករ ហេតុដូច្នោះហើយអ្នកនាងនឹងជម្រុញ ទៅតាមអ្វីដែលកូនស្រីចង់បាន ។ អ្នកនាងបន្តថា ខណៈដែល នាងល្អហួស ពេញចិត្តពេញថ្លើមនឹងសិល្បៈនោះ បច្ចុប្បន្ន កូនស្រីអ្នកនាង មានទីផ្សារហើយ ដោយមានផលិតករ ហៅថតស្ពត ជាច្រើនផងដែរ ។
អ្នកនាងចោមច័ន្ទ បានបន្ថែមថា ក្រៅពីរៀបចំអោយនាងល្អហួស មករៀននៅភ្នំពេញ និងអនុញ្ញាតិ អោយប្រលូក ក្នុងវិស័យសិល្បៈ ពេញដៃពេញជើងនោះ អ្នកនាងនឹងខំប្រឹងជំរុញ នូវចំណុចដ៏ធំមួយទៀតរបស់នាងល្អហួស ដែលប៉ងចេញពីចិត្ត នោះគឺចង់ក្លាយជា បវរកញ្ញា លំដាប់ពិភពលោក តែម្តង ៕
