តារាចម្រៀងសំនៀងផ្អែមលួងលោម ដួង វីរៈសិទ្ធិ ត្រូវបានគេដឹងថា ពេលនេះកំពុងស្ថិតនៅលើទឹកដីសហរដ្ឋអាមេរិក ដើម្បីបំពេញភារកិច្ចសម្តែងជូនបងប្អូនខ្មែរនៅនោះបានទស្សនា ។
ខណៈពេលដែលខ្លួនកំពុងស្ថិតនៅលើទឹកដីសហរដ្ឋអាមេរិកនោះ មុននេះបន្តិចស្រាប់តែតារាចម្រៀង ដួង វិរៈសិទ្ធិ បានបង្ហោះសារលើបណ្តាញសង្គមហ្វេសប៊ុកបង្ហាញពីទុក្ខក្រៀមក្រំមួយថា ពេលនេះ (ថ្ងៃទី ២៥ ខែកញ្ញា ឆ្នាំ ២០១៧) លោកយាយធំរបស់លោកបានទទួលអនិច្ចកម្មហើយនៅមុននេះបន្តិច ដែលដំណឹងដ៏ក្រៀមក្រំនេះបានធ្វើឱ្យតារាចម្រៀង ដួង វីរៈសិទ្ធិ កើតទុក្ខយ៉ាងខ្លាំង ព្រោះតែខ្លួននៅឆ្ងាយមិនអាចមកចូលរួមធ្វើបុណ្យជីដូនបាន ។
តារាចម្រៀង ដួង វីរៈសិទ្ធិ បានសរសេរសារបង្ហោះទាំងអារម្មណ៍ក្តុកក្តួលថា «ចៅនៅ អាមេរិក ឆ្ងាយសែនឆ្ងាយមិនអាចទៅចូលរួមធ្វើបុណ្យជាមួយក្រុមគ្រួសារបានទេ សូមឱ្យលោកយាយធំរបស់ខ្ញុំឈ្មោះ ឆឹង សារិន ហៅ យាយប៊ី អាយុ ៩៣ ឆ្នាំ ទៅកាន់ឋានសួគ៌ គាត់ត្រូវជាបងស្រីបង្កើតរបស់យាយខ្ញុំដែលបានចែកឋានទៅកាល ពី ២ ឆ្នាំមុន តែលោកយាយកុំបារម្ភអី ចៅនឹងបងប្អូនបីនាក់នឹងធ្វើតាមអ្វីដែលចៅធ្លាប់សន្យាថារូបលោកយាយមួយកុំបារម្ភ ចៅមិនទុកយាយចោលទេ…ក្រុមគ្រួសារ និង រៀបចំធ្វើបុណ្យឱ្យលោកយាយ…តាមលោកយាយផ្តាំ…ទោះជាលោកយាយអត់ផ្តាំក៏ត្រូវតែធ្វើដែរ ព្រោះនេះជាតួនាទីរបស់ចៅប្រុសពេលដែលលោកយាយមេម៉ាយម្នាក់ឯង…» ។
នៅពីក្រោយសារនេះដែរ មានបណ្តាប្រិយមិត្តអ្នកគាំទ្រ និង ប្រិយមិត្តអ្នកលេងហ្វេសប៊ុកជាច្រើនបានចូលរួមរំលែកទុក្ខដ៏ក្រៀមក្រំនេះពីតារាចម្រៀង ដួង វីរៈសិទ្ធិ ផងដែរ និង សូមបួងសួងដល់វិញ្ញាណក្ខន្ធលោកយាយធំរបស់តារាចម្រៀងរូបនេះបានទៅកាន់សុគតិភពថែមទៀង ៕ ប្រភព៖ ប្រជាប្រិយ
