ទោះបីជាមានវ័យជ្រេ និង មានកូនស្រីវ័យជំទង់ក៏ពិតមែន តែពិធីការិនី យុគ ចិន្តា នៅតែមានសម្រស់ និង រូបរាងស្រឡូនស្អាតមិនចាញ់តារាស្រករក្រោយប៉ុន្មានឡើយ ។ អ្វីដែលកត់សម្គាល់នោះ កាលពីពេលថ្មីៗនេះ ពិធីការិនីរូបនេះថែមទាំងក្លាយជាអ្នកតំណាងឱ្យផលិតផលមួយ ដែលទើបតែថតឃោសនាកាលពីប៉ុន្មានថ្ងៃមុននេះនៅប្រទេសថៃ ។
កាលពីពេលថ្មីៗនេះអ្នកនាង យុគ ចិន្តា បាននាំកូនស្រី និង ក្រុមការងារមួយចំនួនទៅប្រទេសថៃ ។ ក្រៅពីការជូនកូនស្រីសំណព្វថៅកែអម ទៅលំហែកាយនៅទីនោះ អ្នកនាង យុគ ចិន្តា ក៏ត្រូវទៅថតស្ប៉តពាណិជ្ជកម្មឱ្យផលិតផលរបស់ក្រុមហ៊ុនមួយផងដែរ ។ បើតាមការរៀបរាប់ នៅក្នុងសារដែលបង្ហោះនៅលើបណ្តាញទំនាក់ទំនងសង្គម ពិធីការិនីដ៏មានប្រជាប្រិយភាពរូបនេះបានសរសេរថា «សូមអរគុណដល់ទំនុកចិត្តនឹងភាពជឿជាក់របស់ម្ចាស់ផលិតផលក្នុងការជ្រើសរើសនាងខ្ញុំជាតួឯកនឹងជាអ្នកតំណាងផលិតផលផ្តាច់មុខជាមួយនឹងស្ប៉តពាណិជ្ជកម្មថ្មីនេះ ហើយក៏សូមអរគុណសម្រាប់ការរួមសហការការងាររវាងក្រុមផលិតខ្មែរ ថៃ ដែលបានជ្រោមជ្រែងការថតដោយបញ្ចប់ទៅដោយភាពល្អប្រសើរយ៉ាងក្រៃលែង ស្ប៉តថ្មីបានបញ្ចប់ហើយ ជាពេលវេលាមួយសម្រាប់ត្រលប់ទៅបំពេញកិច្ចការងារផ្សេងៗជាច្រើនទៀត នៅប្រទេសកម្ពុជា»។ ប៉ុន្តែយ៉ាងណា យុគ ចិន្តា មិនបានបញ្ជាក់ថា អ្នកនាងថតស្ប៉តឃោសនាផលិតផលអ្វីនោះទេ ។
មិនមែនជាលើកទីមួយទេ ដែល យុគ ចិន្តា បានលេចមុខនៅក្នុងស្ប៉តឃោសនាផលិតផលនានា ។ តែលើកនេះ នាងអាចគ្រងតំណែងជាអ្នកតំណាងថែមទៀតផង ។ បើតាមមិត្តភក្តិជិតស្និទ្ធជាមួយអ្នកនាងយុគ ចិន្តា បានបង្ហើបប្រាប់ថា ស្ប៉តមួយនេះ យុគ ចិន្តា ទទួលតម្លៃខ្លួនមិនធម្មតាទេ ។ ហើយមូលហេតុ ដែលខាងក្រុមហ៊ុនសម្រេចជ្រើសយក អ្នកនាង យុគ ចិន្តា មកថតស្ប៉តពាណិជ្ជកម្មនោះ ដោយសារអ្នកនាងមានសមត្ថភាព និង ចេះភាសាថៃហើយថែមទាំងមានសម្រស់ស្រស់ស្អាតមិនចាញ់តារាវ័យក្មេងប៉ុន្មានឡើយ ។
យុគ ចិន្តា នៅតែគ្រងតំណែងជាពិធីការិនី ដែលលេចធ្លោនៅស្ថានីយទូរទស្សន៍ស៊ីធីអិន ។ អ្វីដែលកត់សម្គាល់នោះ ទោះបីជាមានការមមាញឹកជាមួយការងារយ៉ាងណាក្តី តែយុគ ចិន្តា នៅតែបំពេញតួនាទីជាម្តាយដ៏ល្អ ដែលតែងតែចំណាយពេលវេលាជាមួយកូនស្រីតែមួយរបស់អ្នកនាងគឺថៅកែអម ៕ ប្រភព ៖ប្រជាប្រិយ
